បន្ទាយមានជ័យ៖ ក្នុងរយៈពេល៣ថ្ងៃ នៃពិធីបុណ្យភ្ជុំបិណ្ឌនៅខេត្តបន្ទាយមានជ័យ ភ្ញៀវទេសចរធ្វើដំណើរកម្សាន្តតាមរមណីយដ្ឋាននានានៅក្នុងខេត្តមានចំនួន ៣៦ ៩៤៣នាក់ កើនឡើងជិត ៣ម៉ឺននាក់ ស្មើនឹងប្រមាណ ៤០០% បើធៀបនឹងរយៈពេលដូចគ្នាឆ្នាំ២០២១។
ប្រធានមន្ទីរទេសចរណ៍ខេត្តបន្ទាយមានជ័យ លោក ឈឿន សេរីវុធ បានប្រាប់ឱ្យភ្នាក់ងារ EAC News ប្រចាំខេត្តបន្ទាយមានជ័យឲ្យដឹងថាក្នុងចំណោមភ្ញៀវទេសចរ ៣៦ ៩៤៣ នាក់ មានភ្ញៀវជាតិចំនួន ៣៦ ៩៣០នាក់ និងភ្ញៀវបរទេសចំនួន ១៣នាក់។
លោក ឈឿន សេរីវុធ បញ្ជាក់ថាភ្ញៀវទេសចរធ្វើដំណើរកម្សាន្តច្រើនជាងគេនៅប្រាសាទបន្ទាយឆ្មារ អាងជើងគ្រុស បារាយមេបុណ្យ អាងទឹកត្រពាំងថ្ម និងដុងអរញ្ញ។
គួរឱ្យដឹងផងដែរថា ក្នុងឱកាសបុណ្យភ្ជុំបិណ្ឌកាលពីឆ្នាំ២០២១ ក្នុងពេលដែលកម្ពុជាប្រឈមខ្លាំងនៃការឆ្លងរាលដាលនៃជំងឺកូវីដ-១៩ មានភ្ញៀវទេសចរណ៍ប្រមាណតែ ៧ ៣៩២នាក់ប៉ុណ្ណោះដែលបានទៅលេងខេត្តបន្ទាយមានជ័យ៕